Grupu Biojoia

Kona-ba

Produtu: Joia (Assessories)

Produtu husi Joia mak produtu ne’ebe úniku liu hotu iha illa Atauro tamba produtu sira ne’e halo husi fatuk tasi ho forma ka modelu oin-oin no balun halo husi ai-musan husi ai-horis oin-oin. Kombinasaun ho tali halo produtu sai furak liu. Atu halo produtu sira ne’e presiza tempu no esforsu maka’as tamba feto sira tenki ba foti/hili fatuk tasi iha tasi ibun no tenki ba foti mos ai-musan sira ne’ebe sei matak iha to’os no depois tenki halo koak ba fatuk tasi no ai musan sira hodi kesi tali no depois tenki hein to ai-musan maran.

Perfil Grupu

Grupu Biojoia hari’i iha tinan 2006 husi Padre Francisco (ema brazileiru) no lidera husi Teresinha da Costa Soares nudar Koordenadora ba grupu Biojoia. Gupu ne’e iha ninia membru hamutuk 10 no úniku husi grupu ne’e mak nia membru sira hotu (exeptu Teresinha) mak Ema ho Defisiensia (tipu sensorial ka labele koalia no rona). Grupu ida ne’e hari’i ho objetivu atu fo biban no esperanca ba feto sira liu-liu feto ho defisiensia sira atu bele halo atividade ekonomia hodi bele hetan osan ba sira nia a’an no ba sira nia familia no iha parte seluk halibur feto ho defisiensia sira hamutuk iha grupu hanesan dalan ida atu hato’o sira nia lian.

Loron-loron feto sira ne’e hasoru malu iha sira nia fatin/loja hodi produs produtu hanesan korente, kelu no brinkus husi material sira mak hanesan ai-kasi musan, ai kafe musan, sipu no seluk tan no faan iha sira nia loja no mos dalabalun sira lori ba feira iha Sentru Atauro Diak (iha Beloi) no mos partisipa iha feira iha Dili.

Grupu Biojoia lokaliza iha Vila Maumeta, Atauro no fasil tebes atu asesu ba grupu nia fatin tamba besik Estrada no tasi ibun no bele kontaktu ba Teresinha da Costa Soares ho númeru telephone +670 77763323 / 7681 2596.

Produtu