Kultural Emprezariu
Empreendedorizmu kulturál la’ós de’it kona-ba rendimentu. Ida ne’e kona-ba dignidade no prezervasaun ba identidade Timor-Leste nian!
Empreza Diak nia parseiru sira hela iha komunidade remota sira, maioria iha ekonomia subsisténsia. ED hetan inspirasaun husi sira-nia istória no servisu hamutuk ho sira atu harii sira-nia konfiansa an, hametin sira-nia grupu no komunidade sira no tulun hodi hetan rendimentu (iha nasaun ida-ne’ebé média rendimentu kada fulan mak $40).
Halo fila fali tradisaun ne’ebé besik atu haluha, lori sustentabilidade rendimentu ba feto sira no sira-nia família iha área remota sira. Ida ne’e proteje arte tradisionál ne’ebé folin-boot no arte-na’in sira maibé mós muda feto sira-nia papél iha komunidade sira. Feto sira ne’ebé inspirador agora iha sira-nia komunidade nia sentru tanba sira la’ós de’it moris ho rendimentu maibé mós haburas identidade ba jerasaun foun sira.
“Molok Empreza Diak hahú servisu ho ami, dala ruma ami soru dala balu de’it no la iha feto ida husi ami-nia komunidade mak ajuda. Agora ha’u soru barak liu no halo osan semana-semana, ha’u-nia bei-oan sira hahú husu ha’u atu hanorin sira oinsá atu soru. Hau orgullu tebes katak arte ne’e sei la mate hamutuk ho ha’u”
– Josefa, lider produtor Rapin Hirik (tipu tais ida-ne’ebé úniku ba Atauro)
Mantein tradisaun moris
Empreza Diak nia programa hasoru kiak no empoderamentu ba feto sira ho títulu “Keeping traditions alive ” haburas arte tradisionál sira ne’ebé besik lakon ona, no ajuda família atus ba atus atu moris hi’as husi kiak no konflitu hahú iha 2014. Liu husi parseria ho komunidade sira atu identifika oportunidade ba meiu moris, hadi’a produtu lokál no fornese asesu ba merkadu.
Empreza Diak servisu iha peskiza ba kadeia valór oioin, dezenvolve oportunidade foun, hadi’a produtu lokál sira, hadi’a tradisaun sira, fornese treinamentu no asesu ba merkadu.
Programa ne’e hetan influénsia husi ED nia konviksaun katak halo tradisaun sai moris-di’ak mak estratéjia ida-ne’ebé forte hodi asegura impaktu no mudansa ne’ebé efetivu iha ema nia moris.
Empreza Di’ak
Projetu “Empreendedorismu Kulturál iha Timor-Leste”
Projetu
Iha tinan 2020 Uniaun Europeia finansia projetu Empreza Diak nian ho títulu ” Empreendedorismu Kulturál iha Timor-Leste – Loke dalan ba Dezenvolvimentu Inkluzivu no Igualdade ” durante períodu tinan 3 hodi promove artezanatu iha Dili/Atauro, Manatuto no Likisa.
Maske Covid 19 nia impaktu negativu iha setór nee, projetu ne’e hametin empreendedorismu kulturál iha Timor-Leste no parseria ho feto rurál sira, mane no foin-sa’e sira hodi hametin setór artezanatu no promove ne’e hanesan mekanizmu empregu no rendimentu ba komunidade rurál sira.
Projetu ne’e servisu besik ho Sekretariu Estadu Arte no Kultura no Sekretariu Estadu Inkluzaun no Igualdade. Atividade hirak-ne’e inklui: mapeamentu setór ne’ebé luan, formasaun no intervensaun kapasitasaun ho parte-interesada oin-oin, apoiu ba Covid 19, apoiu ba espozisaun arte-na’in sira no dezenvolvimentu portal ida-ne’ebé foka ba arte-na’in sira.
Intervensaun ne’e hetan influénsia husi ED nia konviksaun katak halo tradisaun sai moris-di’ak mak estratéjia ida-ne’ebé forte atu asegura impaktu no mudansa ne’ebé efetivu iha ema nia moris.