Grupu Eden

Kona-ba

Produtu: Homan

Iha Uaro-Ana, homan hanesan tradisaun ida ne’ebe laos segredu ona tamba kuaze feto hotu-hotu iha Uaro-Ana hatene homan. Ida ne’e tradisaun husi jerasaun ba jerasaun ne’ebe mak sei eziste to’o ohin loron. Aldeia Uaro-Ana lokaliza iha tasi ibun no feto sira sempre halo atividade hanesan kesi budu tasi no balun dalaruma ba ajuda sira nia kaben hodi prepara redi no ró hodi ba tiha ikan, maske nune’e feto sira sempre homan. Naturalmente homan hanesan atividade ida ne’e fasil tebes ba feto iha Uaro-Ana maibe susar ne’ebe sira hasoru mak material esensial (Akadiru-tahan) ne’ebe sira presiza hodi homan kuaze menus ona. Maske nune’e, situasaun ida ne’e la halo sira atu para homan tamba dalabalun sira tenki sosa fali Akadiru-tahan husi ema seluk nian hodi homan.
Feto sira hanaran sira nia grupu ho naran Eden ne’ebe foti husi Biblia katak fatin/jardin ne’ebe Adaun ho Eva hela ba, no sira hili naran ida ne’e ho hanoin ida atu kria sira nia hela fatin hanesan ho adaun eva nian ne’ebe hakmatek no iha parte seluk tamba sira involve iha atividade igreja nian.

Perfil Grupu

Grupu Eden harii iha 2016 no iha membru hamutuk nain 7 (feto hotu). Sira aprende homan husi sira inan wainhira sira sei ki’ik kedas. Sira gosta homan tamba sira bele kontinua tradisaun no mos liu husi homan feto sira ne’e mos bele hetan osan. Grupu Eden nia produsaun mak hanesan lafatik, luhu, biti, kohe, aifunan no seluk tan.
Grupu ne’e lokaliza iha aldeia Uaro-Ana, suku Beloi, Atauro no bele asesu ho transporte hanesan motor no kareta ka bele mos ho ró lokal tamba besik iha tasi ibun ka bele mos kontaktu liu husi númeru telefone +670 7784 0287

Produtu