Rapin Hirik

Kona-ba

Produtu: Rapin Hirik

Rapin Hirik nudar tradisaun úniku iha Atauro no mos iha Timor-Leste. Tradisaun ida ne’e hahú kedas ona husi avo bei-ala sira to’o jerasaun agora, no úniku iha suku Makadade, Atauro mak sei kontinua tradisaun ida ne’e. Wainhira ita haree Rapin Hirik iha fatin seluk ruma ne’e tamba ema sosa ka foti husi suku Makadade, ka ema husi Makadade mak muda no ba hela iha ne’eba hodi halo Rapin Hirik ne’e.

Tuir istoria katak iha tempu uluk bainhira seidauk iha hena ka roupa, avo sira iha suku Makadade, Atauro soru no uza Rapin Hirik hodi taka isin no ida ne’e sai ona hanesan roupa tradisional husi komunidade sira iha suku Makadade, Atauro. Maibe iha tempu agora, Rapin Hirin bele uza ba dekorasaun, nahe iha meza, sai hanesan prezenti no seluk tan. Prosesu halo Rapin Hirik mak susar liu no presiza tempu barak tamba feto sira tenki ba foti tali-tahan ne’ebe sei nurak, koa halo mihis no tii (hanesan ho tii kabas atu soru) no depois soru tuir medida ne’ebe ita hakarak.

Perfil Grupu

Grupu Rapin Hirik foin mak hari’i iha tinan 2010 iha suku Makadade, Atauro ne’ebe lokaliza iha foho leten no dook husi vila no tasi. Grupu Rapin Hirik agora kompostu husi feto nain 8 husi 12 ne’ebe hari’i grupu ne’e iha tempu ne’eba.

Grupu ne’e hari’i ho objetivu atu kontinua haburas tradisaun Rapin Hirik no mos atu promove liu tan tradisaun ida ne’e ba ema hotu. Loro-loron feto sira ne’e halibur malu hodi soru Rapin Hirik ho ninia medida ne’ebe la hanesan. Feto sira ne’e servisu independente, sira sei husu ajuda ba sira nia kaben/laen wainhira iha servsiu ne’ebe todan liu. Wainhira produtu prontu ona grupu faan produtu sira hodi bele faan hodi hetan osan ba sustenta familia.

Grupu ne’e lidera husi feto deit hanesan Josefa Lisboa Soares, nudar Xefi grupu (7661 4303 / 7655 1817), Alberta de Sousa Araujo, nudar Sekretaria no Olinda Soares, nudar Tesoreira.

Produtu